Неверојатен, мрачен, комичен роман за една богата вдовица и нејзиниот син кои бегаат во Париз по финансискиот распад што го доживуваат во Њујорк

Франсес Прајс, вдовица, посесивна мајка и познат лик меѓу богатите во Апер Ист Сајд, се наоѓа во незавидна положба – таа и нејзиниот возрасен син, Малком, се пред банкрот. Принуден да ја дели нивната судбина е и стариот мачор, Малиот Френк, во чие тело Франсес верува дека живее духот на нејзиниот покоен сопруг, озлогласениот и неморален адвокат Френклин Прајс.
Франсес и Малком одлучуваат да се преселат во Париз, оставајќи ги сиромаштијата и отпадништвото зад себе. Но наместо да најдат оддишка, таму уште повеќе доаѓаат до израз нивните самоуништувачки нагони. Група невообичаени ликови служат да ја истакнат пораката на книгата – срамежливиот приватен детектив, јасновитката без животна цел, семејниот лекар и продавачот на вино. Без поздрав е невообичаена „трагедија на манири“, која изобилува со елементи на пародија. Само Патрик Девит успева толку мајсторски да го исмее високиот сталеж и трогателниот однос меѓу мајката и синот.

„Модерна приказна, сатира за една безгрижна вдовица која трага по совршеното себежртвување… Додека ја читаме книгата, веселиот и опуштен надреализам на Девит прави да ја доживееме како жизнерадосна луда приказна, исто како и нејзините ликови.“
Њујоркер

Добитник на Европската награда за литература

Потпалувачи е приказна за двајца татковци од Белфаст во време на големи социјални немири. Додека градот е во пламен, а властите ја губат контролата, Џонатан и Семи се соочуваат со своите лични демони.

За Џонатан, тоа е момент кога може да го преобрази својот повлечен живот и да ги прифати можностите да се поврзе со луѓето. Како самохран родител на штотуку родена ќерка, дилемата со која треба да се избори е дали да дозволи љубовта кон детето да го попречи фактот дека тоа ги има наследено карактеристиките од мајка си, сирена.

Проблемот на Семи е што неговиот пораснат син ги има сите убиствени особини што и самиот ги поседувал како млад. Семи е убеден дека токму тој е предводник на подметнувањето пожари. Треба ли да го пријави сопствениот син во полиција?

Кога нивните патишта ќе се вкрстат и кога границите помеѓу фантазијата и вистината се замаглуваат, кого овие двајца татковци ќе изберат да заштитат?

Поттикнувачка и возбудливо оригинална, оваа приказна за суровата семејна љубов и жртвувањето е преполна со магија.

„Спектакуларна. Силно реална, лудо магична и примамлива.“ – Донал Рајан.

„Волшебно, интелигентно и храбро.“ – Ајриш тајмс

Две сестри близначки се раѓаат во едно традиционално курдско село, во кое најголемиот чеиз на жената се нејзината чистота и покорност. Животот ги носи по различни патишта – Џамила останува бабица во родниот крај, а Пембе „по грешка“ се мажи за да го види светот. Нејзините деца го бараат своето место под лондонското сонце: седумгодишниот Јунус се здружува со панкерите сквотери, бунтовната Есма се бори против родовата нееднаквост, а најстариот Искендер станува глава на семејството откако татко им ги напушта. Заробено во стегите на минатото и традицијата, целото семејство е неповратно урнисано поради едно морничаво злосторство – убиство од чест.
Возбудлива драма исткаена од бремето на минатото и безвремените морални дилеми. Низ богатата палета од ликови, Шафак ги истражува судирот меѓу традицијата и современоста, другоста во западното општество, како и човековото право на слобода и љубов.

„Мајсторски исткаен роман… со шекспировски заплети и пресврти, кобни знаци и енигми, пророштва и судбини“. Индипендент

„Шафак е храбра писателка… Ова е моќен роман… што провокативно ги разоткрива најмрачните аспекти на верата и љубовта“. Телеграф

Елиф Шафак- Најмоќниот женски глас на светската книжевна сцена

Нема доволно зборови и место за да се каже сè што може за оваа современа турска авторка. За нејзината големина и важност најдобро зборуваат нејзините дела. Преведени на повеќе од 40 светски јазици, македонската публика ја има честа да ја држи в рака третата нејзина книга на македонски. Силни женски ликови, црн хумор, космополитизам и мултикултурализам, преплетување на Истокот и Западот, се само некои од карактеристиките на нејзиното писмо.