Дочекот на Нова година за полицајците во Истанбул секогаш претставуваше ноќен кошмар. Грабежи, пијанства и тепачки, што често завршуваа со нечија смрт, станаа дел од нивната секојдневна рутина. Ова особено важеше за главниот јунак, прекалениот инспектор Невзат. Кога слушнаа дека се случило убиство во квартот Пера, историско јадро на градот што во меѓувреме се претвори во легло на наркоманија, проституција и илегално коцкање, тој не се изненади многу. Доаѓајќи на местото на злосторството, тој сфати дека овој пат станува збор за нешто многу посериозно. Необичниот начин на кој беше извршено убиството, како и идентитетот на жртвата ја навестуваат катастрофата која што за само три дена како последица ќе има смрт на уште девет лица.

Квартот во кој во педесеттите години на минатиот век се одигра прогонот на нивните жители од други нации и вери, повторно го зеде својот крвав данок. Соочен со вистински злосторници, како и со сеништата од сопственото и колективното сеќавање, како и со злокобните претскажувања, тој едвај ги разликуваше сонот и јавето.

Изгледаше дека инспекторот кој зад себе немаше ниеден нерешен случај, освен оној најтрагичниот кога му страдаа жената и ќерката ќе ја затвори фасциклата и ќе подлегне на животната стихија.

Помирен со поразот, отиде на вечера по повод свршувачката на најблиските соработници Али и Зејнеп. Не насетуваше дека токму на семејната трпеза најпосле ќе се разјасни мистеријата на убиството во квартот Пера…