„Ако во изминативе неколку дена научив нешто, тоа е дека човек треба да се бори за среќата.”

По тешкиот развод и непростливото предавство, Џој Канделаро повеќе не може да му се радува на Божиќ, нејзиниот омилен празник. Без размислување купува авионски билет за Канада, очајна да исчезне од познатото опкружување. Кога по неочекуваната несреќа ќе се најде среде дивина, Џој ја зграпчува шансата да исчезне на некое време, да го напушти својот тажен живот и да подише со полни гради.

Во малото гратче Рејн Вели, наоѓа засолниште во зафрлената куќарка на Даниел О’Ши и неговиот шестгодишен син Боби, кој треба да го дочека првиот Божиќ без мајка си. Повлечен и изгубен во својата тага, Боби зборува само со своето замислено другарче – сè додека не ја запознае Џој. Додека таа им помага на Даниел и Боби да закрепнат, нешто сончево и неочекувано почнува да свети во нејзината душа: кревко ветување за нов почеток. Но ниту во Рејн Вели не е cè така како што изгледа и во еден ненадеен момент, новиот свет на Џој е уништен.

На бадниковата ноќ исполнета со чуда, невозможни избори и надеж што мислела дека е изгубена засекогаш, Џој мора да собере храброст да се бори за љубовта, семејството и втората шанса што не верувала дека некогаш ќе ја добие.

Полина Фонтана е жизнерадосна старица која со години е отуѓена од своето американско семејство. Но сега ги поканува своите правнуки Емилија и Лучана да ја придружуваат на патувањето во нејзината родна Италија. Им ветува дека на нејзиниот осумдесетти роденден ќе ја сретне љубовта на својот живот на скалите од катедралата Равело и ќе стави крај на проклетството што ги следи сите второродени ќерки во семејството Фонтана.

Проклетството веројатно е само обична случајност, древен мит. Сепак, неоспорно е дека со векови, ниту една второродена ќерка во семејството Фонтана не пронашла љубов.

Што би се случило ако се растури клетвата? Дали Емилија и Лучана ќеуспеат да ја најдат својата вистинска љубов? Покрај кривулестите венецијански канали, на тосканските полиња и во волшебните селца на брегот на Амалфи, расцветуваат романси, се остваруваат судбини и се откриваат долго чувани семејни тајни – тајни кои се повознемирувачки од проклетството старо со векови..

Сер Филип смета дека знае сè што треба за Елоиз Бриџертон. Од преписката со далечната роднина на неговата покојна сопруга, ja замислува како повлечена стара мома која копнее да стапи во брак. Затоа, решава да ја запроси. Но… таа воопшто не е таква. Жената што стои пред неговиот праг е вистинско изненадување – не само што е убава, туку е и храбра, зборлива и мошне паметна. А секогаш кога ќе престане да зборува, тој посакува само едно – да ја бакне.

Елоиз Бриџертон никогаш не би се омажила за човек што не го познава. Но совладана од љубопитноста, се качува во кочија и тргнува во ноќта за да го запознае мажот кој се надева дека ќе биде нејзиниот совршен сопруг. Но… тој воопшто не е таков. Нејзиниот совршен партнер не би бил толку намуртен и некултурен. И несомнено требало да ѝ спомене дека има две мали и мошне немирни деца, на кои им е потребна мајка, исто колку што нему му е потребна сопруга.