Тој е вистински играч и тоа не само во хокејската арена…
Студентот од трета година, Џон Логан, може да ја добие секоја девојка што ќе ја посака. За оваа хокејска ѕвезда, животот е низа забави и врски за една вечер, но зад неговите неодоливи насмевки и ноншалантен шарм се крие сè поголемиот очај поради ќор-сокакот во кој ќе се најде по дипломирањето. Возбудливата вечер што ќе ја помине со бруцошката Грејс Ајверс е токму она што му е потребно за да му ги одврати мислите од проблемите. Но кога со една непромислена грешка ќе ја оттурне од себе, Логан планира да ја помине последната година на колеџ докажувајќи ѝ дека вреди да му даде втора шанса.

Но сега ќе мора да ја смени тактиката…
Иако првата година не помина како што си замислуваше, Грејс се враќа на Универзитетот „Брајар“ постара и помудра. Освен тоа, наполно го има преболено арогантниот хокеар кому за малку ќе му ја предадеше својата невиност. Таа не е кутра, ниту пак е повлечената девојка каква што беше кога првпат се сплеткаа. Ако Логан очекува таа да клечи и да го моли како и сите други негови „другарки“, тогаш гадно се излажал. Сака да му се врати? Ќе мора убаво да се помачи. Овој пат, таа ќе седи зад воланот… и планира да го излуди.

Во снежните Шкотски Гори, Сузан Мекбрајд сонува за совршен Божиќ. Нејзините три посвоени ќерки доаѓаат дома за празниците и таа со нетрпение ги чека. Напнатоста расте…

Хана, зависничка од работа, знае дека не може две години по ред да го избегнува празнувањето со семејството. Но паниката не е предизвикана од тежината на нивните очекувања – туку од големата тајна што ја крие.

Мајката домаќинка Бет доживува лична криза и за време на Божиќ сака само да размисли дали е подготвена да се врати на работа – семејната средба би требало да ѝ го намали стресот, не да го зголеми.

Поузи не е сигурна дека ужива во животот, но бидејќи нејзините родители зависат од неа, ризично е да направи промена. Но сепак, не е толку ризично колку што е вљубувањето во прекрасниот нов сосед Лук.

Додека сонот на Сузан за совршен Божиќ пропаѓа, мора да верува дека празничната магија ќе ги сплоти нејзините ќерки. Но дали оваа нова сплотеност ќе ги научи сестрите дека нивната врска е доволно цврста за да издржи сѐ – вклучувајќи и еден необичен семеен Божиќ?