Веќе се докажа дека сите си ги сакаме овие книги во стилот на „Очајни домаќинки“… Стилот на Ејми Молој во книгава ме потсетуваше на Мориарти, а самото тоа што се работи за 4-5 жени уште повеќе го засили впечатокот. Ја читав книгава уште кога не беше официјално излезена и мило ми е поради тоа, бидејќи немаше простор туѓи мислења и оцени да влијаат на оформување на мојата. Сега гледам дека веќе има оцени од скоро 30.000 читатели на GR, но мојата оцена дефинитивно е повисока од групната.
Книгава годинава беше нарекувана „најисчекувана книга на летото“, а наскоро ќе биде и филм со Кери Вашингтон во главната улога. Станува збор за доста заразен психолошки трилер за група жени кои се зближуваат кога исчезнува новороденчето на едната од нив, бидејќи се членови на истата група на мајки кои се сретнуваат во градскиот парк секоја недела. Бидејќи целите животи сега им се вртат само околу бебињата, се договараат една вечер да излезат сами и да се олабават малку. Едната од нив, самохраната мајка Вини, не е расположена да го остави бебето со дадилка, но сите останати ја убедуваат дека сè ќе биде океј, па таа најпосле попушта. И вечерта додека тие се излезени, нејзиното бебе го снемува од дома. И сега знаете, следи паника и вперување прст – сите бараат виновник за едно или за друго, некој мора да ја понесе вината. Новинарите ѝ се сипуваат најпрво на мајката; како можела да го остави новороденчето со непозната, каде била таа вечерта, кој е татко на бебето и така натаму.
Ова не е една од оние книги со нови пресврти во секоја глава, па можеби затоа некои очекувале повеќе од неа – не, овде дејствието е повеќе водено од ликовите и ако се поврзеш со нив како што треба, тогаш приказната се чита за една вечер, просто не ти се остава. Ја имаме најпрво Нел, која цела книга ме засмеваше со саркастичната смисла за хумор, но која очигледно крие некоја голема тајна од сите. Потоа Колет, која очигледно има прекрасен маж и доста пари, но и храброст што може да ѝ донесе големи проблеми. И на крај, симпатичната Френси, паничарката која најмногу се вознемирува од киднапирањето, до степен што почнува да станува дури и сомнителна. Дали е Френси толку невина колку што се прави или…?
Оваа книга многу добро овозможува да се ѕирне како е во животот на секоја тазе мајка и одлично покажува дека не постои такво нешто како „совршена мајка“. Најмногу ќеф ми направи крајот – да бидам искрена, не го очекував; очекував нешто тотално друго, а тоа дефинитивно е достигнување, нешто од трилери да ме изненади мене. Плус, пак си заплакав малку за негативецот – тоа е таа тежина кога ќе успее да те погоди приказна. Па, се надевам дека ќе ја прочитате и дека ќе ја доживеете како и јас. Едвај чекам да го гледам филмот!
Александар Николовски – :
Многу добра книга, иако за 5 ми недостигаше уште малку. 🙂 Се надевам продолжението дека е уште подобро.
Слаѓан – :
Тензична, мрачна и непредвидлива. Одлична психолошка-трилер/драма!
Ана Ѓурова – :
#ТеПредизвикувамеДаЧиташ
#СакамКнигиПредизвик1
Рецензија
“Пазете што посакувате, оти може да се исполни”, но може да има страшни последици од желбата.
Книгава ја прочитав во рекордно време и досега вакво нешто немам прочитано. Толку многу делува на психата, што ти се чини дека ќе те измести. Не ми се верува што може 6-дишно девојче да направи и предизвика. Иако не можам да поверувам, но сигурно во светов постои и вакво нешто, па дури и полошо. Оваа книга ќе ви побуди многу чувства, емоции, но најмногу ќе ви предизвика бес.
Среќниот пар Кристофер и Хана се медицински лица, тој хирург, а таа медицинска сестра. Нивниот брак е хармоничен, совршен, среќен, но сепак им недостасува едно делче од сложувалката наречена живот. А тоа е дете, нивната единствена желба за да ја исполнат празнината во нивниот живот. Еден ден во болницата каде работат стигнува 6-дишно девојче Џејни. Крис како нејзин хирург се поврзува со неа, повеќе од обичен пациент. Кога треба да ја отпишат од болница, тој ја убедува Хана да ја згрижат. Таа не е воодушевена, но се согласува. Џејни пак е толку комплицирано дете со оштетена психа, што дури е неверојатна на секој начин. Таа се поврзува со Крис, а бесот го насочува кон Хана. Кога се двете сами, таа има испади, вришти, крши и ред други гнасни работи. Крис не и верува на Хана и таа почнува да попушта со нервите,посебно кога ќе добијат нов член. Џејни вешто манипулира со Крис, но нејзиното минато може да го растури семејството.
Што се случува понатаму, дали Џејни ќе ги оддалечи Крис и Хана, дали Хана ќе попушти на нејзиниот бес и испади, прочитајте сами. Книгава не ја препорачувам на луѓе со слаби нерви, па дури и со слаб желудник. Во секој случај добар трилер за читање.
Мона (го има купено овој производ од сајтот) – :
Одлична книга со хорор примеси. Доколку сакате квалитетно потрошено време тогаш прочитајте ја.
Стефани – :
Необичен трилер,но сепак е интересен!😊